ಅಪರೂಪವಾದರೂ ಬದುಕ ರುಚಿ ಹೆಚ್ಚಿಸುವ ಅವನಂತೆ!

ಕೇಸರಿಯ ಒಂದೆರಡು ಎಸಳು

ಸಿಹಿಗೆ ಅದೆಂಥ ಘಮ ತರುತ್ತದೆ!

ಹೆಚ್ಚು ಬಳಸಲಾಗದು, ಬೆಲೆ ಹೆಚ್ಚು

ಅಪರೂಪವಾದರೂ ಬದುಕ ರುಚಿ ಹೆಚ್ಚಿಸುವ ಅವನಂತೆ!

ಭಾರತಿ ಬಿ. ವಿ.

ಒಳಗೆ ಕೊಳೆತರೆ ಹೊರಗೆ ತಿಳಿಯುವುದೇ ಇಲ್ಲ ...

ಉಪ್ಪಿನಕಾಯಿಯೇ ವಾಸಿ

ಕೆಟ್ಟಾಗ ಮೇಲೆ ಬೂಷ್ಟು ಬೆಳೆಯುತ್ತದೆ

ಮನುಷ್ಯರದ್ದೇ ಸಮಸ್ಯೆ!

ಒಳಗೆ ಕೊಳೆತರೆ ಹೊರಗೆ ತಿಳಿಯುವುದೇ ಇಲ್ಲ

ಭಾರತಿ ಬಿ. ವಿ.

ಬೊಗಳೆ ಮನುಷ್ಯರ ಬಿಲ್ಡಪ್...

ಎಲೆ ಕೋಸು ಈರುಳ್ಳಿಯ ಒಳಗೇನಿದೆ

ಎಂಬ ಭ್ರಮೆ, ಕುತೂಹಲದಿಂದ

ಪದರಪದರಗಳನ್ನು ಬಿಡಿಸಿದ ನಂತರ

ಬೊಗಳೆ ಮನುಷ್ಯರ ಬಿಲ್ಡಪ್ ನೆನಪಾಗುತ್ತದೆ!

ಭಾರತಿ ಬಿ. ವಿ.

ನಮ್ಮಂತೆ ನೀನೇಕಿಲ್ಲ ...

ಚಹಾ ಪುಡಿಗೆ ನೀರು ಹಾಕಿ ಕುದಿಸಬಹುದು

ಕಾಫಿ ಪುಡಿ ಹಾಗೆ ಕುದಿಸಿದರೆ ರುಚಿಗೆಡುತ್ತದೆ

ನಮ್ಮಂತೆ ನೀನೇಕಿಲ್ಲ, ಯಾಕಷ್ಟು ಸೂಕ್ಷ್ಮ ಅನ್ನುವವರಿಗೆಲ್ಲ

ಇದೇ ನನ್ನ ಉತ್ತರ, ಅಷ್ಟೇ!

ಭಾರತಿ ಬಿ. ವಿ.

ಬೇಸರದಿಂದ ಮಾತನಾಡಿಕೊಳ್ಳುತ್ತವೆ ...

ಈಗೀಗ ಯಾರೂ ನಮ್ಮೊಡನೆ ಕುಳಿತು

ಊಟ ಮಾಡುವುದೇ ಇಲ್ಲ

ಎಂದು ಬೇಸರದಿಂದ ಮಾತನಾಡಿಕೊಳ್ಳುತ್ತವೆ

ಊಟದ ಮೇಜು ಮತ್ತು ಕುರ್ಚಿಗಳು

ಭಾರತಿ ಬಿ. ವಿ.

ಹೊಗೆ ಏಳುವುದು ಮಾತ್ರ ನಿಂತೇ ಇಲ್ಲ…

ಹಿಂದೆ ಸೌದೆ ಒಲೆಯ ಹೊಗೆ ಮನೆ ಆವರಿಸುತ್ತಿತ್ತು

ಈಗೆಲ್ಲ ಚಿಮಣಿಗಳು ಹೊಗೆ ಹೊರಗೆ ಹಾಕುತ್ತವೆ

ಒಟ್ಟಿನಲ್ಲಿ ಆಗಿನಿಂದ ಈಗಿನವರೆಗೆ

ಹೊಗೆ ಏಳುವುದು ಮಾತ್ರ ನಿಂತೇ ಇಲ್ಲ…

ಭಾರತಿ ಬಿ. ವಿ.

ಮೊದಲ ಪ್ರೇಮದ ಸವಿಯಂತೆ...

ಉಕ್ಕಿದ ನೊರೆಯ ಹಾಲು ಬೆರೆತ

ಮೊದಲ ಡೋಜ಼ಿನ ಕಾಫಿಯ ರುಚಿ

ಮುಂದಿನವುಗಳಲ್ಲಿ ಇರುವುದಿಲ್ಲ,

ಮೊದಲ ಪ್ರೇಮದ ಸವಿಯಂತೆ!

ಭಾರತಿ ಬಿ. ವಿ.

ಸಿಕ್ಕಾಗ ಕೂಡಿಟ್ಟುಕೊಳ್ಳಬೇಕು...

ಮಾವಿನಕಾಯಿ ಕಾಲವಿರುವಾಗ

ತುಸು ಮೈಬಗ್ಗಿಸಿ ತುರಿದು ಫ್ರೀಜರ್ ನಲ್ಲಿಟ್ಟರೆ

ಬೇಕು ಬೇಕೆಂದಾಗ ಚಿತ್ರಾನ್ನ, ಗೊಜ್ಜು…

ಪ್ರೀತಿಯೂ ಅಷ್ಟೇ, ಸಿಕ್ಕಾಗ ಕೂಡಿಟ್ಟುಕೊಳ್ಳಬೇಕು

ಭಾರತಿ ಬಿ. ವಿ.

ಹೊಂದಾಣಿಕೆಯ ಪಾಠ

ಹೆಂಗಸರು ಹೊಂದಾಣಿಕೆಯ ಪಾಠ

ಚಪಾತಿಯಿಂದಲೂ ಕಲಿಯುತ್ತಾರೆ,

ಹಿಟ್ಟು ಕಡಿಮೆ ಇದ್ದಾಗ ಕೂಡ

ಸುತ್ತಳತೆ ಕಡಿಮೆಯಾಗದಂತೆ ಲಟ್ಟಿಸಬಹುದು

ಭಾರತಿ ಬಿ. ವಿ.

ಒಮ್ಮೆ ಕರಿದ ಎಣ್ಣೆಯಲ್ಲಿ ...

ಒಮ್ಮೆ ಕರಿದ ಎಣ್ಣೆಯಲ್ಲಿ ಮತ್ತೆ ಕರಿಯಬಾರದು,

ಹೃದಯಕ್ಕೆ ಹಾನಿಕರ ಎನ್ನುತ್ತಾರೆ

ಸಂಬಂಧಗಳಿಗೇ ಎರಡನೇ ಅವಕಾಶ ಕೊಡುತ್ತೇವಂತೆ,

ಇನ್ನು ಎಣ್ಣೆಯೇನು ಪಾಪ ಮಾಡಿತ್ತು!

ಭಾರತಿ ಬಿ. ವಿ.