ನೆನಪಾಗುತ್ತದೆ ...

ಮೂರು ಗಾಲಿಯ
ತಿರುಗು ಕುರ್ಚಿಯ ಮೇಲೆ
ತಲೆಯ ಮೇಲೆ ತಿರುಗುತ್ತ
ತಂಪು ಗಾಳಿಯ ನೂಕುವ
ಪಂಕದಡಿ ಕುಳಿತಾಗ
ನೆನೆಪಾಗುತ್ತದೆ
ಬಿಸಿಲ ಝಳಕ್ಕೆ
ಕಾದಗಾಳಿಗೆ ಬಾಡಿರುವ
ನಿನ್ನ ಮುಖ

ಸೂಟು ಬೂಟು ತೊಟ್ಟು
ಕನ್ನಡಿಯ ಮುಂದೆ ನಿಂತು
ಶಾಂಪು ಹಚ್ಚಿ ತೊಳೆದ
ತಲೆ ಕೂದಲನ್ನು
ಒಪ್ಪಮಾಡುವಾಗ
ನೆನಪಾಗುತ್ತದೆ
ಹೊತ್ತು ಮುಳುಗುವ ಹೊತ್ತು
ಕೆದರು ತಲೆಯ ಮೇಲೆ
ಹೊರೆಯ ಹೊತ್ತು
ಬರಿಗಾಲಿನಲಿ ಬರಬರನೆ
ಮನೆಗೆ ಬಂದದ್ದು

ಊಟದ ಟೇಬಲ್ಲಿನ ಮೇಲೆ
ಓರಣವಾಗಿ ಜೋಡಿಸಿರುವ
ಪರಿಕರಗಳನು ಕಂಡಾಗ
ನೆನೆಪಾಗುತ್ತದೆ
ಹೊಲದಲ್ಲಿ ಹಗಲೂಟಕ್ಕೆಂದು
ಕೊಟ್ಟ ರೊಟ್ಟಿಯನ್ನು
ಮಡಿಲಲ್ಲಿ ಕಟ್ಟಿ ತಂದು
ಗಂಟಲಿನಿಂದ ಗುಟುಕು
ಕೊಟ್ಟಂತೆ ಕೊಟ್ಟದ್ದು

ನೆನೆಪಾಗುತ್ತದೆ
ಎರಡನೇ ಓಣಿಯ ಊರೆಂಬ
ಊರಿನ ಜನ
ಹೊಟ್ಟೆಕಿಚ್ಚಿನ ಮೊಟ್ಟೆ ಇಟ್ಟಾಗ
ಸಿಟ್ಟಾಗಿ ಹಿಂಗಾಡಿದರೆ ನೆಟ್ಟಗಿರಲ್ಲ
ಎಂದು ಗುಟುರು ಹಾಕಿದ್ದು

ಎಟಿಎಂ ಯಂತ್ರದ ಮುಂದೆ ನಿಂತು
ರೊಕ್ಕದ ಗುಂಡಿ ಒತ್ತಿದಾಗ
ತಪತಪ ಬೀಳುವ
ಗರಿಗರಿಯ ಕೆಂಪನೆಯ
ನೋಟುಗಳನ್ನು ಕಂಡಾಗ
ನೆನಪಾಗುತ್ತದೆ
ಸೊಂಟಕ್ಕೆ ಸುತ್ತಿದ್ದ ಸೀರೆಯ
ಬಾಳೆಕಾಯಿ ಗಂಟಿನಿಂದ
ಬೆವರಿನಿಂದ ನೆಂದು
ಮೆದ್ದೆಯಾಗಿದ್ದ
ರೂಪಾಯಿಯ ನೋಟು
ತೆಗೆದು ಕೊಟ್ಟು
ಫೀಜು ಕಟ್ಟು ಎಂದದ್ದು

ದೀಪಾವಳಿ ಹಬ್ಬಕ್ಕೆ ಮಾಡಿರುವ
ಬಿಸಿಬಿಸಿ ಹೋಳಿಗೆಗೆ ತುಪ್ಪ ಹಚ್ಚಿ
ಹೊಟ್ಟೆ ತುಂಬ ಉಂಡು
ರಾಕೆಟ್ ಪ್ಲವರ್ ಪಾಟ್
ಹಚ್ಚಿ ಖುಷಿಪಡುವಾಗ
ನೆನಪಾಗುತ್ತದೆ
ಓದುವ ಮಗ ಬಂದಿಲ್ಲ
ಎಂದು ಊರೆಲ್ಲ ದೀಪಾವಳಿ
ಮಾಡುವಾಗ ಹಬ್ಬಮಾಡದೆ
ಮುದ್ದೆಮಾಡಿ ಉಂಡದ್ದು
ಆಮೇಲೆ
ಕುಟ್ಟು ಪಟಾಕಿ ಕೊಡಿಸಿದ್ದು

ನೆನಪಾಗುತ್ತದೆ
ಸರೀಕರೆದುರು ಸದರ
ಆಗಬಾರದು ನೋಡು
ಎಂದು ಬುದ್ಧಿ ಹೇಳಿದ್ದು
ಅವ್ವ ಹೆಂಗಿದೀಯ ಎಂದಾಗ
ನಂದೇನು ಬಿಡಪ್ಪಾ
ಇವತ್ತೋ ನಾಳೆಯೋ
ನೀನು ಚೆಂದಾಗಿರು
ಎಂದಾಗ
ಮೈಯೆಲ್ಲ ಬೆವರಿ
ಕಣ್ಣು ಮಂಜಾಗುತ್ತವೆ

ಕೆ.ಎಂ. ಗಂಗಾಧರಪ್ಪ