ನಮ್ಮ ದೇಶದಲ್ಲಿ ...

ಮೂಲ ಹಿಂದಿ ಕತೆ: ದಿ|| ಕಮಲೇಶ್ವರ್
ಪ್ರಕಟವಾದ ವರ್ಷ: ಇಂಡಿಯಾ ಟುಡೆ ಸಾಹಿತ್ಯ ವಾರ್ಷಿಕಿ ೧೯೯೩-೯೪ (ದೀಪಾವಳಿ ವಿಶೇಷಾಂಕ, ಅತ್ಯುತ್ತಮ ಕತೆಗಾಗಿ ಪ್ರಥಮ ಬಹುಮಾನ )
ಅನುವಾದ: ರಮೇಶ್ ಎಚ್.ಟಿ.

ನಮ್ಮ ದೇಶದಲ್ಲಿ.....

          ಡೋವರ್‌ನಿಂದ ಹೊರಟು ಇಂಗ್ಲಿಷ್ ಛಾನಲ್ ದಾಟಿ ಓಸ್ಟೆಂಡ್ ಪೋರ್ಟ್ ತಲುಪಲು ಸುಮಾರು ಮೂರು ಮೂರೂವರೆ ಘಂಟೆಗಳಷ್ಟು ಸಮಯ ಹಿಡಿಯಿತು.  ನಾವು ಪ್ರಯಾಣಿಸಿದ ಹಡಗು ಅಷ್ಟೇನೂ ದೊಡ್ಡದಿರಲಿಲ್ಲ.  ಅದು ಓಸ್ಟೆಂಡ್ ಪೋರ್ಟ್ ತಲುಪಿ ಲಂಗರು ಹಾಕಿ ಶಾಂತವಾದಾಗ ಸಮುದ್ರದಲ್ಲಿ ಭೀಕರ ಅಲೆಗಳ ನರ್ತನ ನಡೆದಿತ್ತು.  ಆಳೆತ್ತರದ ಅಲೆಗಳು ಭೋರ್ಗರೆಯುತ್ತಾ ಬಂದು ದಡಕ್ಕೆ ಅಪ್ಪಳಿಸಿ ಅದೇ ವೇಗದಲ್ಲಿ ಹಿಂದೆ ಸರಿದು ಕಡಲಿನಲ್ಲಿ ಮಾಯವಾಗುತ್ತಿದ್ದವು.  ಎಲ್ಲೆಡೆ ದಟ್ಟವಾದ ಮಂಜು ಮುಸುಕಿತ್ತು.  ಸೂರ್ಯ ಮೋಡಗಳ ಮರೆಯಲ್ಲೆಲ್ಲೋ ಅವಿತುಕೊಂಡು ಆಗಾಗ ಮಾಸಿದ ಬೆಳ್ಳಿಯ ನಾಣ್ಯದ ರೂಪದಲ್ಲಿ ಕಾಣಿಸಿಕೊಳ್ಳುತ್ತಿದ್ದ.  ತಣ್ಣನೆಯ, ನಿಸ್ತೇಜ ಸೂರ್ಯ!

          ಮೈಕ್ ನನ್ನ ಹೆಗಲ ಮೇಲೆ ಕೈಯಿರಿಸಿ, "ನಾವು ಓಸ್ಟೆಂಡ್ ತಲುಪಿದ್ದೇವೆ.  ಅಂದರೆ ನೀನು ನಮ್ಮ ದೇಶವಾದ ಬೆಲ್ಜಿಯಂನಲ್ಲಿರುವೆ!" ಎಂದು ಘೋಷಿಸಿದ.

          ಹಡಗಿನ ಅಪ್ಪರ್ ಡೆಕ್‌ನಲ್ಲಿದ್ದ ನನ್ನ ಕಾರನ್ನು ಹೊರ ತೆಗೆದು ರಸ್ತೆಯ ಮೇಲಕ್ಕೆ ತಂದು ನಿಲ್ಲಿಸಿದೆ.  ಪೆಟ್ರೋಲ್ ಮುಗಿಯುತ್ತಾ ಬಂದಿದ್ದರಿಂದ ಹತ್ತಿರದಲ್ಲೇ ಇದ್ದ ಗ್ಯಾಸ್ ಸ್ಟೇಷನ್‌ಗೆ ಹೋದೆವು. ಆದರೆ ಅಲ್ಲಿ ಪೆಟ್ರೋಲ್ ಕೊಡಲು ಯಾರೂ ಇರಲಿಲ್ಲ.  ಐದಾರು ಸಲ ಹಾರ್ನ್ ಮಾಡಿದ ಮೇಲೆ ಒಬ್ಬ ವ್ಯಕ್ತಿ ಬಂದು, "ಯಸ್ ಸರ್! ವಾತ್ ಕೆನ್ ಐ ದೂ ಫ಼ಾರ್ ಯೂ?" ಎಂದು ನಮ್ಮನ್ನು ಗುರುತಿಸಿ ಇಂಗ್ಲಿಷ್‌ನಲ್ಲಿ ಕೇಳಿದ.  ಅವನ ಉಚ್ಚಾರಣೆ ದಟ್ಟವಾದ ಫ಼್ರೆಂಚ್ ಸ್ವರಭಾರ (ಎಕ್ಸೆಂಟ್) ದಿಂದ ಕೂಡಿತ್ತು.  "ಗ್ಯಾಸ್! ಆಂಡ್ ದೆನ್ ಆನ್ ಆಕ್ಟೋಪಸ್ ಟು ಹೋಲ್ಡ್ ಅವರ್ ಲಗೇಜ್ ಆನ್ ದಿ ಟಾಪ್....." ಎಂದು ವಿವರಿಸಿ ಹೇಳಿದೆ.

          ಕಾರಿಗೆ ಪೆಟ್ರೋಲ್ ತುಂಬಿದ ಮೇಲೆ ಆ ವ್ಯಕ್ತಿ ಹೇಳಿದ, "ಯೂ ಪ್ಲೀಸ್ ಕಮ್ ತು ಅವರ್ ದಿಪಾರ್ತ್‌ಮೆಂತ್ ಸ್ತೋರ್, ಕೌಂತರ್ ನಂಬರ್ ತ್ರೀ!"

          ಡಿಪಾರ್ಟ್‌ಮೆಂಟ್ ಸ್ಟೋರ್‌ನ ಕೌಂಟರ್ ನಂಬರ್ ಮೂರರ ಬಾಗಿಲು ತೆರೆದು ಒಳ ಹೋದಾಗ ಬಾಗಿಲಿಗೆ ಕಟ್ಟಿದ್ದ ಕಿರು ಘಂಟೆಯೊಂದು ಶಬ್ದ ಮಾಡಿ ನಾವು ಒಳ ಪ್ರವೇಶಿಸಿದುದನ್ನು ಸೂಚಿಸಿತು.  ಘಂಟೆಯ ಶಬ್ದ ಕೇಳಿ ನಮಗೆ ಪೆಟ್ರೋಲ್ ನೀಡಿದ ವ್ಯಕ್ತಿ ಪ್ರತ್ಯಕ್ಷನಾಗಿ, "ಯಸ್ ಸರ್! ವಾತ್ ಕೆನ್ ಐ ದೂ ಫ಼ಾರ್ ಯೂ?" ಎಂದು ವಿಚಾರಿಸಿದ.  "ಐ ನೀಡ್ ಆನ್ ಆಕ್ಟೋಪಸ್ ಟು ಹೋಲ್ಡ್ ಅವರ್ ಲಗೇಜ್ ಆನ್ ದಿ ಟಾಪ್!" ಎಂದು ಹೇಳಿದೆ.

          "ಓ ದತ್!  ಹತ್ತು ನಿಮಿಷಗಳ ಹಿಂದೆ ನಮಗೆ ಪೆಟ್ರೋಲ್ ನೀಡಿದ ವ್ಯಕ್ತಿ ನಮ್ಮನ್ನು ಈ ಹಿಂದೆ ನೋಡಿಯೇ ಇಲ್ಲದವನಂತೆ ನಟಿಸುತ್ತಾ, "ಸರ್! ಯು ವಿಲ್ ಹ್ಯಾವ್ ತು ಗೋ ತು ಕೌಂತರ್ ನಂಬರ್ ಫ಼ೈವ್!" ಎಂದ.

          ನಾವು ಕೌಂಟರ್ ನಂಬರ್ ಐದಕ್ಕೆ ಹೋದಾಗ ಮೊದಲಿನಂತೆಯೇ ಘಂಟೆಯೊಂದು ಶಬ್ದ ಮಾಡಿತು.  ಅದೇ ವ್ಯಕ್ತಿ ಮತ್ತೆ ಬಂದು ನಮ್ಮನ್ನು ನೋಡಿಯೇ ಇಲ್ಲದವನಂತೆ, "ಯಸ್ ಸರ್! ವಾತ್ ಕೆನ್ ಐ ದೂ ಫ಼ಾರ್ ಯೂ?" ಎಂದು ವಿನಯವಾಗಿ ಕೇಳಿದ.  ನಾನು ಸಿಟ್ಟಿನಿಂದ ಮನಸ್ಸಿನಲ್ಲಿಯೇ, "ಯೂ ಡ್ಯಾಮ್ ಫ಼ೂಲ್ ಆಫ಼್ ಎ ಮ್ಯಾನ್" ಎಂದುಕೊಳ್ಳುತ್ತಾ, "ಐ ನೀಡ್ ಆನ್ ಆಕ್ಟೋಪಸ್ ಟು ಹೋಲ್ಡ್ ಅವರ್ ಲಗೇಜ್ ಆನ್ ದಿ ಟಾಪ್....." ಎಂದು ಈ ಮೊದಲು ಹೇಳಿದ್ದನ್ನೇ ಹೇಳಿದೆ.

          "ಸಾರಿ ಸರ್! ಯೂ ನೀದ್ ಆನ್ ಆಕ್ತೋಪಸ್.....ಪ್ಲೀಸ್ ಕಮ್ ತು ಕೌಂತರ್ ನಂಬರ್ ತೆನ್.....ಯು ವಿಲ್ ಗೆತ್ ಇತ್....." ಎಂದು ಹೇಳಿ ಹೊರಟು ಹೋದ.

          ಕೌಂಟರ್ ನಂಬರ್ ಹತ್ತಕ್ಕೆ ಹೋದಾಗ ಎಲ್ಲಾ ಮೊದಲಿನಂತೆಯೇ ಪುನರಾವರ್ತನೆಯಾಯಿತು.  ಆ ವ್ಯಕ್ತಿ ಮತ್ತೆ ಹಾಜರಾಗಿ, ಅಪರಿಚಿತನಂತೆ, "ಯಸ್ ಸರ್! ವಾತ್ ಕೆನ್ ಐ ದೂ ಫ಼ಾರ್ ಯೂ?" ಎಂದು ಕೇಳಿದ.  ನನ್ನ ತಾಳ್ಮೆ ಮೀರಿತು.  ಸಿಟ್ಟಿನಿಂದ, "ನಥಿಂಗ್....." ಎಂದು ಕಿರುಚಿದೆ.

          "ಥ್ಯಾಂಕ್ ಯೂ ಸರ್!" ಎಂದೇಳಿ ಆ ವ್ಯಕ್ತಿ ಏನೂ ನಡೆದೇ ಇಲ್ಲವೇನೋ ಎಂಬಂತೆ ಅಲ್ಲಿಂದ ಹೊರಟು ಹೋದ.  ನಾನು ಹೆಚ್ಚು ಕಮ್ಮಿ ಅವಮಾನಿಸಲ್ಪಟ್ಟವನಂತೆ ನಿಂತುಬಿಟ್ಟೆ.  ಒಬ್ಬ ವ್ಯಕ್ತಿ ಒಂದೊಂದು ನಿಮಿಷಕ್ಕೂ ಈ ರೀತಿ ’ಅಪರಿಚಿತ’ ಹೇಗಾಗಬಲ್ಲನೆಂಬುದೇ ನನಗೆ ಅರ್ಥವಾಗಲಿಲ್ಲ.  ನಾನು ಮೈಕ್‌ನತ್ತ ನೋಡಿದೆ.  ಅವನಿಗೆ ಎಲ್ಲವೂ ಅರ್ಥವಾಗಿ ಹೋಗಿತ್ತು.  ಆದರೆ ಏನೂ ಮಾತನಾಡಲಿಲ್ಲ.  ಮೆಲ್ಲಗೆ ನಕ್ಕು ಸುಮ್ಮನಾದನಷ್ಟೆ.

          "ನಿಮ್ಮ ದೇಶದ ಜನ ಇಷ್ಟೊಂದು ಉದಾಸೀನರು, ನಿರಾಸಕ್ತರು, ಸಭ್ಯರು ಹಾಗೂ ಅಪರಿಚಿತರೇ?" ಎಂದಿದ್ದಕ್ಕೆ ಮೈಕ್, "ಇದನ್ನೆಲ್ಲಾ ನೀನು ಅರ್ಥ ಮಾಡಿಕೊಳ್ಳಬೇಕಾದರೆ ನೀನು ನಿನ್ನ ಮನಃಸ್ಥಿತಿಯನ್ನೇ ಬದಲಿಸಬೇಕಾಗುತ್ತದೆ!" ಎಂದು ಬೆಲ್ಜಿಯಂನಲ್ಲಿ ನಡೆದ ಭಾಷಾ ವಿವಾದಗಳ ಬಗ್ಗೆ ವಿವರಿಸತೊಡಗಿದ.  ಇದೇ ಮಾತು ಕತೆಯಲ್ಲಿ ಮಗ್ನರಾಗಿದ್ದ ನಾವು ರಸ್ತೆಯನ್ನೇ ಮರೆತುಬಿಟ್ಟಿದ್ದೆವು.  ಎಂಟ್‌ವರ್ಪ್ ನಗರದಿಂದ ಹೊರಟ ನಾವು, ಹೋಗಬೇಕಾದ ಸ್ಥಳ ಬಿಟ್ಟು ಬೇರೆ ಯಾವುದೋ ಊರಿಗೆ ಬಂದುಬಿಟ್ಟಿದ್ದೆವು.  ತುಂಬಾ ಹಸಿವೆಯಾಗಿದ್ದರಿಂದ ಊಟ ಮಾಡಲೆಂದು ಅಲ್ಲೇ ಹತ್ತಿರದಲ್ಲಿದ್ದ ಟ್ಯಾವರ್ನ್‌ಗೆ ಹೋದೆವು.  ಕೌಂಟರ್‌ನಲ್ಲಿ ಕುಳಿತಿದ್ದ ಹುಡುಗಿಗೆ ಮೈಕ್ ಫ಼್ರೆಂಚ್‌ನಲ್ಲಿ ಏನೋ ಹೇಳಿದ.  ಆದರೆ ಆಕೆ ಏನೂ ಮಾತನಾಡದೇ ಇದ್ದದ್ದರಿಂದ ಮೈಕ್ ಸನ್ನೆಯಲ್ಲಿ ಕೌಂಟರ್‌ನಲ್ಲಿರುವ ಟೆಲಿಪೋನ್ ಉಪಯೋಗಿಸಬಹುದೇ ಎಂದು ಕೇಳಿದ.  ಅದು ಕೆಟ್ಟಿರುವುದಾಗಿ ಆಕೆ ಸನ್ನೆಯಲ್ಲಿಯೇ ತಿಳಿಸಿದಳು.

           ಕೊನೆಗೆ ಮೈಕ್ ಬಂದು ನನ್ನ ಪಕ್ಕದಲ್ಲಿ ಕುಳಿತುಕೊಂಡ.  ನಾನು ಅವನನ್ನು ಛೇಡಿಸುವ ಉದ್ದೇಶದಿಂದ, "ನಿನ್ನ ದೇಶದ ಜನರಿಗೆ ನಿನ್ನ ಭಾಷೆ ಅರ್ಥವಾಗುವುದಿಲ್ಲವೆ?" ಎಂದೆ.

           "ಏಕೆ?"

           "ನೀನು ಆಕೆಗೆ ಫ಼್ರೆಂಚ್‌ನಲ್ಲಿ ಏನೋ ಹೇಳಿದೆ.  ಆದರೆ ಆಕೆ ಮಾತನಾಡಲೇ ಇಲ್ಲವಲ್ಲ."

          "ಇದು ಫ಼್ಲೆಮಿಶ್ ಮಾತನಾಡುವ ಪ್ರದೇಶ.  ಇಲ್ಲಿಯ ಜನರಿಗೆ ಫ಼್ರೆಂಚ್ ಗೊತ್ತಿದ್ದರೂ ಗೊತ್ತಿಲ್ಲದವರಂತೆ ನಟಿಸುತ್ತಾರೆ!"

 

            ನಾನು ಟ್ಯಾವರ್ನ್‌ನನ್ನೊಮ್ಮೆ ಪರೀಕ್ಷಾ ದೃಷ್ಟಿಯಿಂದ ನೋಡಿದೆ.  ಒಳಗಿನ ಕೋಣೆಯಲ್ಲಿ ಗಾಜಿನ ಮಣಿಗಳಿಂದ ತಯಾರಿಸಿದ ಶ್ಯಾಂಡಿಲಿಯರನ್ನು ತೂಗಿಬಿಡಲಾಗಿತ್ತು.  ಅದೇ ಕೋಣೆಯಲ್ಲಿ ಕೆಲವು ಸ್ಪ್ಯಾನಿಷ್‌ಗಳು ಬಿಲಿಯರ್ಡ್ಸ್ ಆಡುತ್ತಿದ್ದರು.  ನಮ್ಮ ಮುಂದಿನ ಟೇಬಲ್‌ನಲ್ಲಿ ಕೆಲವು ಡಚ್ ಯುವಕರು ಮತ್ತು ಯುವತಿಯರು ಬಿಯರ್ ಕುಡಿಯುತ್ತಿದ್ದರು.  ಅವರಲ್ಲಿ ಕೆಲವರು ವೆಯ್ಟರ್‌ಗೆ ಏನೋ ಹೇಳುತ್ತಿದ್ದರು.  ಆತ ಸುಮ್ಮನೆ ನಗುತ್ತಾ ನಿಂತಿದ್ದನೇ   ಹೊರತು  ಏನನ್ನೂ  ಮಾತನಾಡುತ್ತಿರಲಿಲ್ಲ.    ಈ ವಿಷಯವಾಗಿ  ಮೈಕ್‌ನನ್ನು  ಕೇಳಿದಾಗ,  ಅವರು ವೆಯ್ಟರ್‌ಗೆ ಫ಼್ರೆಂಚ್‌ನಲ್ಲಿ ಮಾತನಾಡಿದರೆ ಟಿಪ್ಸ್ ಕೊಡುತ್ತೇವೆಂದು ಹೇಳುತ್ತಿರುವುದಾಗಿ ತಿಳಿಯಿತು.  ಅದೇ ಸಮಯಕ್ಕೆ ನಮ್ಮ ಟೇಬಲ್ಲಿನ ವೆಯ್ಟರ್ ಬಂದು ಏನೂ ಕುಡಿಯದೇ ಅಥವಾ ಕುಡಿಸದೇ ಇದ್ದರೆ ಟೇಬಲ್ ಖಾಲಿ ಮಾಡುವುದಾಗಿ ಒರಟಾಗಿ ಹೇಳಿದ.  ನನಗದು ಆತ ಮಾತನಾಡಿದ ರೀತಿಯಿಂದಲೇ ತಿಳಿಯಿತು.  ಪ್ರಪಂಚದಲ್ಲಿ ಒಬ್ಬರು ಮತ್ತೊಬ್ಬರಿಗೆ ಗೌರವ ಸೂಚಿಸುವ ರೀತಿ ಹಲವು ಬಗೆಯಾದರೆ, ಅಪಮಾನ ಮಾಡುವ ರೀತಿ ಹೆಚ್ಚು ಕಡಿಮೆ ಒಂದೇ ರೀತಿಯಾಗಿರುತ್ತದೆ, ಅಲ್ಲವೇ?

           ನಾನು ಮೈಕ್‌ಗೆ, "ಮೊದಲು ಬಿಯರ್ ತರಲು ತಿಳಿಸು.  ಮುಂದೇನು ಮಾಡಬೇಕೆಂಬುದನ್ನು ನಿಧಾನವಾಗಿ ಕುಳಿತು ಯೋಚಿಸೋಣ" ಎಂದೆ.

           ಮೈಕ್ ಸನ್ನೆಯಲ್ಲಿಯೇ ಬಿಯರ್ ಮತ್ತು ಷೋಲ್ ಪಿಶ್ ತರಲು ತಿಳಿಸಿ, "ರಾತ್ರಿಯಾಗುತ್ತಾ ಬರುತ್ತಿದೆ,  ಮಂಜು ಕೂಡಾ ದಟ್ಟವಾಗಿ ಕವಿಯಲಾರಂಭಿಸಿದೆಯಾದ್ದರಿಂದ ಆದಷ್ಟು ಬೇಗ ಊಟ ಮುಗಿಸಿ ಹೊರಡುವುದು ಒಳ್ಳೆಯದು" ಎಂದ.

           ನಾನು ಹೌದೆಂದು ತಲೆಯಾಡಿಸಿದೆ.

 

          "ಒಂದು ವೇಳೆ ಭಾಷೆಯ ತೊಂದರೆಯಿಂದ ನಾವು ಹೋಗಬೇಕಾದ ಸ್ಥಳವನ್ನು ತಲುಪಲು ಸಾಧ್ಯವಾಗದೇ ಹೋದರೆ ಬ್ರಸ್ಸೆಲ್ಸ್‌ಗೆ ಹೋಗೋಣ.  ಒಂದು ರಾತ್ರಿಯ ಮಟ್ಟಿಗಾದರೂ ನನ್ನ ತಂದೆ-ತಾಯಿಗಳು ಆಶ್ರಯ ನೀಡೇನೀಡುತ್ತಾರೆ!" ಮೈಕ್ ಹೇಳಿದ.

          "ಏಕೆ?  ಏನಿದರ ಅರ್ಥ?  ನಾನು ಬಿಯರ್ ಗುಟುಕರಿಸುತ್ತಾ ಕೇಳಿದೆ, "ನಿನ್ನ vಂದೆ ತಾಯಿಯ ಹತ್ತಿರ ಜಗಳ ಮಾಡಿಕೊಂಡಿದ್ದೀಯೇನು?"

          "ಹೌದು"

          "ಏಕೆ?"

          "ಏಕೆಂದರೆ ನಮ್ಮ ದೇಶದಲ್ಲಿ ನನಗೆ ನಿದ್ರೆ ಬರುವುದಿಲ್ಲ!".  ಅವನ ದಾರ್ಶನಿಕ ರೀತಿಯ ಮಾತುಗಳು ನನಗೆ ಅರ್ಥವಾಗಲಿಲ್ಲ.  "ಏನಿದರ ಅರ್ಥ?" ಎಂದು ಕೇಳಿದೆ.

          "ನನ್ನ ಆತ್ಮದ ಮೇಲೆ ಒಂದು ದೊಡ್ಡ ಹೊರೆಯಿದೆ.  ಏಕೆಂದರೆ ನನ್ನ ದೇಶ ತನ್ನ ಸಕಲ ಸಂಪತ್ತನ್ನೂ ಆಫ್ರಿಕಾದ ಬೆಲ್ಜಿಯನ್ ಕಾಂಗೋ (ಈಗಿನ ಝಾಯ್‌ರೆ) ಮತ್ತು ಕಟಾಂಗಾ (ಈಗಿನ ಶಬಾ) ಗಳಿಂದ ಸಂಪಾದಿಸಿದೆ.....  ಸಂಪಾದಿಸಿಲ್ಲ, ಲೂಟಿ ಮಾಡಿದೆ.....  ಅಲ್ಲಿ ಚಿನ್ನ ಮತ್ತು ತಾಮ್ರದ ಗಣಿಗಳು ಹೇರಳವಾಗಿದ್ದವು.  ಪ್ಯಾಟ್ರಿಸ್ ಲುಮುಂಬಾರವರನ್ನು ಹತ್ಯೆ ಮಾಡಿದವರು ನಮ್ಮ ದೇಶದವರೇ.  ಕಾಂಗೋ ಮತ್ತು ಕಟಾಂಗಾಗಳಲ್ಲಿನ ಆಫ್ರಿಕನ್ ಕೊಳಚೆ ಪ್ರದೇಶಗಳಲ್ಲಿ ವಾಸಿಸುತ್ತಿದ್ದ ಜನರನ್ನು ಸುಧಾರಿಸುವ ನೆಪದಲ್ಲಿ ಬರ್ಬರ ಯಾತನೆಗೊಳಪಡಿಸಲಾಯ್ತು.  ನಾವು ಅವರನ್ನು ನಮ್ಮ ಇಲ್ಲಿಯ ಗುಲಾಮರಿಗಿಂತ ಕೆಟ್ಟ ಸ್ಥಿತಿಯಲ್ಲಿಟ್ಟೆವು....."  ಮೈಕ್ ಬಿಯರ್ ಗುಟುಕರಿಸಿ ಮತ್ತೆ ಮುಂದುವರಿಸಿದ, "ಮೀನನ್ನು ಮುಗಿಸು, ರಾತ್ರಿಯಾಗುತ್ತಿದೆ.....  ಒಂದು ವೇಳೆ ರಾತ್ರಿ ಉಳಿದುಕೊಳ್ಳಲು ಎಲ್ಲೂ ಜಾಗ ಸಿಗದಿದ್ದರೆ ಲೂವೆನ್‌ಗೆ ಹೋಗಿಬಿಡೋಣ".

          "ಲೂವೆನ್?"

 

          "ಹೌದು.  ನಾನು ಓದಿದ ಊನಿವರ್ಸಿಟಿಯಿರುವ ನಗರ.....  ಅಲ್ಲಿಗೆ ಹೋಗಿ ಊನಿವರ್ಸಿಟಿಯ ಕೆಫ಼ೆಯಲ್ಲಿ ತಂಗೋಣ.....  ಆ ಕೆಫ಼ೆಯನ್ನು ಇಂದಿಗೂ ಆಫ್ರಿಕನ್ನರೇ ನಡೆಸುತ್ತಿದ್ದಾರೆ.  ಫ಼್ಲೆಮಿಶ್ ಭಾಷಾ ಆಂಧೋಲನವನ್ನು ಪ್ರಾರಂಭಿಸಿದವರು ಈ ಯೂನಿವರ್ಸಿಟಿಯ ವಿಧ್ಯಾರ್ಥಿಗಳೇ.....  ಲೂವೆನ್‌ಗೆ ಹೋಗಲು ನಿನಗೆ ಇಷ್ಟವಿಲ್ಲದಿದ್ದರೆ ವ್ಹೀಗೆ ಹೋಗೋಣ.....  ಅಲ್ಲಿ ಫ಼ಾದರ್ ಡೋಮೊನಿಕ್ ಪಿಯರೆಯವರು ಸ್ಥಾಪಿಸಿರುವ ಊನಿವರ್ಸಿಟಿ ಆಫ಼್ ಪೀಸ್ ಇದೆ....."

          ಇದ್ದಕ್ಕಿದ್ದಂತೆ ಟ್ಯಾವರ್ನ್‌ನಲ್ಲಿ ಭಯಂಕರ ಹೊಡೆದಾಟ ಪ್ರಾರಂಭವಾಯ್ತು.  ಕೂಗಾಟ ಮತ್ತು ಚೀರಾಟಗಳ ನಡುವೆ ಗ್ಲಾಸ್, ಪ್ಲೇಟ್ ಮತ್ತು ಖಾಲಿ ಬಿಯರ್ ಬಾಟಲ್‌ಗಳ ಹಾರಾಟವೂ ಶುರುವಾಯ್ತು.  ಈ ಗಲಾಟೆಯ ನಡುವೆ ಹೇಗೋ ನಮ್ಮ ಬಿಲ್ ಪಾವತಿಸಿ ಟ್ಯಾವರ್ನ್‌ನಿಂದ ಹೊರಬಂದೆವು. ಈಗಾಗಲೇ ಪೂರ್ತಿಯಾಗಿ ಕತ್ತಲಾಗಿತ್ತು.  ಫ಼ಾಗ್ ಲೈಟ್‌ಗಳ ಮೇಲೆ ಅಲ್ಲಲ್ಲಿ ಬಿಳಿಯ ಮೋಡಗಳು ತೇಲುತ್ತಿದ್ದವು.  ಆ ಮೋಡಗಳಿಂದ ಆಕಾಶದಿಂದ ತೂರಿಬಿಟ್ಟ ಹತ್ತಿಯಂತೆ ಹಿಮ ಸುರಿಯುತ್ತಿತ್ತು.....  ಟಾಂಗಾರಿನ್ ಮೂಲಕ ನಾವು ವ್ಹೀ ತಲುಪಿದೆವು.  ಬೆಟ್ಟ-ಗುಡ್ಡಗಳಿಂದ ಕೂಡಿದ ಈ ನಗರದಲ್ಲಿಯೇ ಫ಼ಾದರ್ ಡೋಮೋನಿಕ್ ಪಿಯರೆಯವರು ’ಶಾಂತಿದ್ವೀಪ’ ವನ್ನು ಸ್ಥಾಪಿಸಿದ್ದಾರೆ.....  ಪಶ್ಚಿಮದಲ್ಲಿ ಮ್ಯೂಜ಼್ ನದಿ ಶಾಂತವಾಗಿ ಮಲಗಿತ್ತು.  ನಾವು ಕೆಫ಼ೆಯ ಹತ್ತಿರ ಬರುತ್ತಿದ್ದಂತೆ ಹಿಮದಿಂದ ಕೂಡಿದ ಬಿರುಗಾಳಿ ಪ್ರಾರಂಭವಾಯ್ತು.  ಕೆಫ಼ೆ ಆಗಲೇ ಮುಚ್ಚಿದ್ದರಿಂದ ಬಿರುಗಾಳಿಯಿಂದ ರಕ್ಷಣೆ ಪಡೆಯಲೆಂದು ಕೆಫ಼ೆಯ ತ್ರಿಕೋನಾಕಾರದ ಛಾವಣಿಯುಳ್ಳ ಪೋರ್ಟಿಕೋದಲ್ಲಿ ನಿಂತೆವು.  ಹಿಮದ ಸಣ್ಣ ಸಣ್ಣ ಬಿಂದುಗಳು ಗಾಳಿಯಲ್ಲಿ ತೇಲಿ ಬಂದು ನಮ್ಮ ಓವರ್‌ಕೋಟ್ ಮೇಲೆ ಕುಳಿತು ಮುತ್ತಿನ ಮಣಿಗಳಂತೆ ಮಿನುಗಿ, ಕುಳಿತಲ್ಲೇ ಮಾಯವಾಗುತ್ತಿದ್ದವು.  ಬಿರುಗಾಳಿ ನಿಂತ ಮೇಲೆ ನಾವು ಮೆಯಿನ್ ಹಾಲ್‌ನತ್ತ ನಡೆದೆವು.  ಮುಖ್ಯದ್ವಾರವನ್ನು ಮುಂದು ಮಾಡಲಾಗಿತ್ತು.  ಅಗುಳಿ ಹಾಕಿರಲಿಲ್ಲ.

          "ಇದೇ ಜಾಗದಲ್ಲಿ ನಾವು ಶಪಥ ತೆಗೆದುಕೊಂಡಿದ್ದೆವು!"

          "ಏನೆಂದು ಶಪಥ ತೆಗೆದುಕೊಂಡಿದ್ದಿರಿ?"

 

          "ನಾವು ನಮ್ಮ ಇತಿಹಾಸವನ್ನು ಕ್ಷಮೆ ಕೇಳುತ್ತೇವೆ.....  ಜಾಂಬಿಯಾಗೆ ಹೋಗಿ ಯಾವ ಪೀಡಿಯ ಜನರನ್ನು ನಮ್ಮ ಪೂರ್ವಜರು ಹಿಂಸಿಸಿದ್ದರೋ ಅವರಿಗಾಗಿ ರಸ್ತೆಗಳನ್ನು ನಿರ್ಮಿಸುತ್ತೇವೆ, ಮನೆಗಳನ್ನು ಕಟ್ಟುತ್ತೇವೆ, ಅವರ ಹೊಲಗಳಲ್ಲಿ ವ್ಯವಸಾಯ ಮಾಡುತ್ತೇವೆ ಹಾಗು ಅವರನ್ನು ಕತ್ತಲೆಯ ಕೂಪದಿಂದ ಹೊರತರುತ್ತೇವೆಂದು ಶಪಥ ಮಾಡಿದ್ದೆವು....."

          "ಅಂದರೆ ನೀನು ಜಾಂಬಿಯಾಗೆ ಹೋಗಿದ್ದೆಯಾ?"  ಹಾಲ್‌ನೊಳಗೆ ಪ್ರವೇಶಿಸುತ್ತಾ ಕೇಳಿದೆ.

 

          "ಹೌದು.  ಜಾಂಬಿಯಾಗೆ ಹೋಗಿದ್ದೆ.  ನಾನು ತೆಗೆದುಕೊಂಡ ಶಪಥವನ್ನು ಮುರಿಯುವುದಾದರೂ ಹೇಗೆ?  ನನ್ನ ತಂದೆಯ ತಾಮ್ರದ ಗಣಿಯಿದ್ದ ಪ್ರದೇಶದಲ್ಲೇ ನಾಲ್ಕು ವರ್ಷ ಇದ್ದೆ.  ಅಲ್ಲಿಯೇ ನನಗೆ ನೀಗ್ರೋ ಜನಾಂಗಕ್ಕೆ ಸೇರಿದ ಮಾರಿಯಾಳ ಪರಿಚಯವಾದದ್ದು.  ನಾನು ಅವಳನ್ನೇ ಮದುವೆಯಾಗುವುದಾಗಿ ಅವಳಿಗೆ ಮಾತು ಕೊಟ್ಟಿದ್ದೆ....."

          "ಆಮೇಲೆ ಏನಾಯ್ತು?"

 

        "ನಾನು ಯಾವತ್ತು ಆಕೆಯನ್ನು ಮದುವೆಯಾಗುತ್ತೇನೋ ಅಂದಿನಿಂದಲೇ ತಾನು ವೇಶ್ಯಾವೃತ್ತಿಯನ್ನು ಬಿಟ್ಟುಬಿಡುವೆನೆಂದು ಮಾರಿಯಾ ನನಗೆ ಮಾತು ಕೊಟ್ಟಿದ್ದಳು.  ಆದರೆ ನನ್ನ ತಂದೆ-ತಾಯಿಗಳಿಗೆ ನಾನು ಮಾರಿಯಾಳನ್ನು ಮದುವೆಯಾಗುವುದು ಇಷ್ಟವಿರಲಿಲ್ಲ.....  ಅವರು ನನ್ನ ಪಾಸ್‌ಪೋರ್ಟನ್ನು ರದ್ದುಪಡಿಸಿದ್ದರಿಂದ ಬೆಲ್ಜಿಯಂಗೆ ವಾಪಸ್ ಬರಬೇಕಾಯಿತು.  ಮಾರಿಯಾಳನ್ನು ಮದುವೆಯಾಗಬಯಸುವ ಯವಕರಿಗೇನೂ ಕಮ್ಮಿಯಿಲ್ಲ.  ಆದರೆ, ಆಕೆಗೆ ಒಬ್ಬ ನಿರ್ದಿಷ್ಟ ವ್ಯಕ್ತಿಯ ಅವಶ್ಯಕತೆಯಿದೆ!"

          "ಆ ವ್ಯಕ್ತಿ ಕೇವಲ ನೀನು ಮಾತ್ರ ಆಗಬಲ್ಲೆಯಾ?"

          "ಹೌದು.  ಆ ಜನರನ್ನು ತಲೆಮಾರುಗಳ ಸಂತಾಪದಿಂದ ಹೊರತರಬಲ್ಲ ವ್ಯಕ್ತಿ.  ಯಾರ ಪೂರ್ವಜರು ಮಾರಿಯಾ ಮತ್ತು ಮಾರಿಯಾಳಂತಹ ಅನೇಕ ಅಸಹಾಯಕ ಹೆಣ್ಣುಮಕ್ಕಳಿಗೆ ವೇಶ್ಯಾವೃತ್ತಿ ನಡೆಸಲು ಲೈಸೆನ್ಸ್ ಕೊಡಿಸಿ ಅವರನ್ನು ಈ ಸ್ಥಿತಿಗೆ ತಂದರೋ ಅವರೇ ಈ ಕೆಲಸ ಮಾಡಬೇಕು!  ಮೈಕ್ ತುಂಬಾ ಆವೇಶದಿಂದ ಮಾತನಾಡುತ್ತಿದ್ದ, "ನಾನು ನನ್ನ ತಂದೆ-ತಾಯಿ ಮತ್ತು ನಮ್ಮ ದೇಶವನ್ನು ಎಷ್ಟು ಗಾಢವಾಗಿ ಪ್ರೀತಿಸುತ್ತೇನೆಂದು ನಿನಗೆ ಗೊತ್ತಿಲ್ಲ.....  ಆದರೆ, ನನ್ನ ಅದೇ ತಂದೆ-ತಾಯಿ ಮತ್ತು ದೇಶವನ್ನು ಅಷ್ಟೇ ದ್ವೇಷಿಸುತ್ತೇನೆ.....  ಏಕೆಂದರೆ ನಮ್ಮ ದೇಶದಲ್ಲಿ ನನಗೆ ನಿದ್ರೆ ಬರುವುದಿಲ್ಲ.....  ಮಲಗಿದರೆ ರೋದಿಸುತ್ತಿರುವ ಜಾಂಬಿಯಾ ನನ್ನ ಸ್ವಪ್ನದಲ್ಲಿ ಬರುತ್ತದೆ, ಹೋಗಲಿ ಬಿಡು, ಈಗೇಕೆ ಆ ಮಾತು.....  ಛಳಿ ತುಂಬಾ ಜಾಸ್ತಿಯಾಗುತ್ತಿದೆ, ಅಲ್ಲವೇ?"

 

          ಹಾಲ್‌ನಲ್ಲಿ ಗಾಂಧೀಜಿಯ ಒಂದು ದೊಡ್ಡ ಭಾವಚಿತ್ರವನ್ನು ತೂಗುಹಾಕಲಾಗಿತ್ತು.  ಜೊತೆಗೇ ಎನಿ ಫ಼್ರೆಂಕ್‌ಳ ಭಾವಚಿತ್ರವಿತ್ತು.  ಆ ಭಾವಚಿತ್ರಗಳ ಕೆಳಗೆ ಒಂದು ಗಿಟಾರನ್ನು ಇರಿಸಲಾಗಿತ್ತು.  ಜೊತೆಗೇ ಒಣ ಹೂಗಳ ಪುಷ್ಪಗುಚ್ಛವೊಂದನ್ನೂ ಸಹ ಇರಿಸಲಾಗಿತ್ತು.

          "ಹೂಗಳು ತುಂಬಾ ಸುಂದರವಾಗಿವೆ."

          "ಹೌದು, ಒಣ ಹೂಗಳು ನಮ್ಮ ದೇಶದ ವಿಶೇಷತೆ.  ಲೂವೆನ್‌ನಲ್ಲಿ ಬರಿ ಒಣ ಹೂಗಳೇ ಸಿಗುವುದು.....  ಆದರೆ ಒಂದಲ್ಲ ಒಂದು ದಿನ ಈ ಒಣ ಹೂಗಳು ಹಸಿರಾಗುತ್ತವೆಂಬ ಭರವಸೆ ನನಗಿದೆ!"  ಮೈಕ್ ಫ಼ೈರ್ ಪ್ಲೇಸ್‌ನಲ್ಲಿ ಬೆಂಕಿ ಹೊತ್ತಿಸುತ್ತಾ ಹೇಳುತ್ತಿದ್ದ.

          ಅವನು ಕನಸಿನಲ್ಲಿ ಮುಳುಗಿರುವನೆಂದು ನನಗನ್ನಿಸಿತು.  ಅವನ ಸುಂದರ ಸ್ವಪ್ನವನ್ನು ಮುರಿಯಲಿಚ್ಛಿಸದೆ ನಾನು ಮೌನಿಯಾದೆ.  ಫ಼ೈರ್ ಪ್ಲೇಸ್‌ನ ಮುಂದೆ ಬೆಂಕಿ ಕಾಯಿಸುತ್ತಿದ್ದ ಮೈಕ್‌ನ ಮುಖ ತಾಮ್ರದಂತೆ ಹೊಳೆಯುತ್ತಿತ್ತು.

          "ಮೈಕ್!"

          "ಹೂಂ!"

          "ಬೆಂಕಿಯ ಮುಂದೆ ಕುಳಿತಿರುವುದರಿಂದ ನಿನ್ನ ಮುಖ ತಾಮ್ರದಂತೆ ಹೊಳೆಯುತ್ತಿದೆ".

          "ತಾಮ್ರದ ಗಣಿಗಳನ್ನು ಲೂಟಿ ಮಾಡಿದವರ ಮಕ್ಕಳ ಮುಖಗಳು ತಾಮ್ರದಂತೆ ಮಾತ್ರ ಹೊಳೆಯಬಲ್ಲವು.....  ಆ ಮುಖಗಳ ಮೇಲೆ ಬೇರೆ ಹೊಳಪು ಬರುವುದಾದರೂ ಹೇಗೆ?"  ಇತಿಹಾಸ ಇದನ್ನೇ ತಾನೆ ಕೊಡುವುದು.....  ಗಲ್ಫ್ ವಾರ್‌ನಲ್ಲಿ ಸಿಡಿದ ಮಿಸೈಲ್‌ಗಳ ಬೆಳಕಿನಲ್ಲಿಂದು ಅಮೆರಿಕನ್ನರ ಮುಖಗಳು ಸಿಡಿಮದ್ದಿನಂತೆ ಹೊಳೆಯುತ್ತಿಲ್ಲವೇ?  ಒಂದಲ್ಲ ಒಂದು ದಿನ ಅಮೆರಿಕನ್ನರೂ ಕೂಡಾ ಇತಿಹಾಸಕ್ಕೆ ಉತ್ತರ ಕೊಡಬೇಕಾಗುತ್ತದೆ.....  ಅಷ್ಟಕ್ಕೂ, ಈಗ ಧ್ವಂಸಗೊಂಡಿರುವ ಸೋವಿಯತ್ ಸಂಘದ ವೈಚಾರಿಕ ಭೌತಿಕವಾದ ಮತ್ತು ಅಮೇರಿಕಾದ ಯಾಂತ್ರಿಕ ಭೌತಿಕವಾದಗಳ ನಡುವೆ ವ್ಯತ್ಯಾಸವೇನಿದೆ?  ಶೀತಲ ಯುದ್ದವೇನೋ ಮುಗಿದಿದೆ, ಆದರೆ ಆರ್ಥಿಕ ಯುದ್ದ ಇನ್ನೂ ಮುಗಿದಿಲ್ಲ.....  ಸೇನಾಧಿಪತಿಗಳು ಬದಲಾಗುತ್ತಲೇ ಇದ್ದಾರೆ, ಆದರೆ ಯುದ್ದಗಳಿನ್ನೂ ಜಾರಿಯಲ್ಲಿವೆ....."

          "ಮೈಕ್ ನನಗೆ ನಿದ್ರೆ ಬರುತ್ತಿದೆ, ಮಲಗಲೇ?"

          "ಆಗಲಿ ಮಲಗಿಕೋ."

          "ನೀನು ಮಲಗುವುದಿಲ್ಲವೇ?"

          "ಇಲ್ಲ, ನನಗೆ ನಿದ್ರೆ ಬರುವುದಿಲ್ಲ....."

          "ಪ್ರಯತ್ನಿಸು."

          "ಆಗಲಿ, ಪ್ರಯತ್ನಿಸುತ್ತೇನೆ....."

           ಇಬ್ಬರೂ ಮಲಗಿಕೊಂಡೆವು.  ಫ಼ೈರ್ ಪ್ಲೇಸ್‌ನಲ್ಲಿ ಉರಿಯುತ್ತಿದ್ದ ಮಂದ ಬೆಳಕಿನಲ್ಲಿ ಗಾಂಧೀಜಿ ಮತ್ತು ಎನಿ ಫ಼್ರೆಂಕ್‌ರ ಭಾವಚಿತ್ರಗಳು ಅಸ್ಪಷ್ಟವಾಗಿ ಕಾಣುತ್ತಿದ್ದವು.  ಕ್ರಮೇಣ ನನ್ನನ್ನು ಗಾಢವಾದ ನಿದ್ರೆ ಆವರಿಸಿತು. 

          ನನಗೆ ಏಕಾ‌ಏಕಿ ಎಚ್ಚರವಾಯ್ತು.  ದೂರದಲ್ಲಿ ಯಾರೋ ಗಿಟಾರ್ ನುಡಿಸುತ್ತಿರುವ ಶಬ್ದ ಕೇಳಿ ಬರುತ್ತಿತ್ತು.  ಪಕ್ಕದಲ್ಲಿ ಮೈಕ್ ಇರಲಿಲ್ಲ.  ನಾನು ಮೇಲೆದ್ದು ಫ಼ೈರ್ ಪ್ಲೇಸ್‌ನತ್ತ ನೋಡಿದೆ.  ಅದರಲ್ಲಿ ಕೆಂಡಗಳು ಇನ್ನೂ ನಿಗಿನಿಗಿಸುತ್ತಿದ್ದವು.  ಹಿಮದಿಂದ ಕೂಡಿದ ಬಿರುಗಾಳಿ ಎಡೆಬಿಡದೇ ಸಾಗಿತ್ತು.  ವರಾಂಡಾದಲ್ಲಿ ಮೈಕ್ ಆವೇಶಭರಿತನಾಗಿ ಗಿಟಾರ್ ನುಡಿಸುತ್ತಾ ಕುಳಿತಿದ್ದ.....

          ನಾನು ಮೆಲುವಾಗಿ ಕೂಗಿದೆ, "ಮೈಕ್".  ಅದು ಅವನಿಗೆ ಕೇಳಿಸಲಿಲ್ಲ.  ಗಿಟಾರ್ ನುಡಿಸುವುದರಲ್ಲಿ ಮಗ್ನನಾಗಿದ್ದ.  ಕೊನೆಗೆ ಅವನ ಭುಜ ಹಿಡಿದು ಅಲುಗಿಸಿದಾಗ -

          "ಓ ನೀನು; ಸಾರಿ, ನಿನ್ನ ನಿದ್ರೆಯನ್ನು ಹಾಳುಮಾಡಿಬಿಟ್ಟೆ....."

          "ಖಂಡಿತಾ ಇಲ್ಲ."

          "ಹೋಗು ಮಲಗಿಕೋ."

          "ನಾನು ಮಲಗುವುದು ಹಾಗಿರಲಿ, ಈ ಕೊರೆಯುವ ಛಳಿಯಲ್ಲೂ ನೀನು ಬೆವರುತ್ತಿರುವೆಯಲ್ಲಾ, ಸ್ವಲ್ಪ ವಿಶ್ರಮಿಸು.  ಆಗಲೇ ಅರ್ಧ ರಾತ್ರಿ ಕಳೆದಿದೆ, ಮಲಗು ಬಾ."

 

          "ದೋಸ್ತ್, ನಾನಾಗಲೇ ನಿನಗೆ ಹೇಳಿಲ್ಲವೇ.....  ನಮ್ಮ ದೇಶದಲ್ಲಿ ನನಗೆ ನಿದ್ರೆ ಬರುವುದಿಲ್ಲವೆಂದು.....  ನಾನೇನು ಮಾಡಲಿ?  ನೀನು ಈಗ ನಮ್ಮ ದೇಶದಲ್ಲಿದ್ದೀಯ, ನಿದ್ರೆ ಮಾಡು.  ನೀನು ಹಿಂದೂಸ್ತಾನಕ್ಕೆ ಹಿಂತಿರುಗಿದ ಮೇಲೆ ಬಹುಶಃ ನಿನಗೂ ನನ್ನ ಹಾಗೆ ನಿದ್ರೆ ಬಾರದೇ ಹೊಗಬಹುದು.....

 

-***-