ಕ್ಷಮಿಸಿಬಿಡು ನನ್ನ ಕಂದಮ್ಮ

ಆಸೆಗಳ ಮೂಟೆ ಹೊತ್ತು ಮದುವೆಯಾದೆ
ಕನಸುಗಳ ಸಿರಿಯ ಹೊತ್ತು ಮಡದಿಯಾದೆ
ದೈವಗಳಿಗೆ ಹರಕೆ ಹೊತ್ತು ನಾ ತಾಯಿಯಾದೆ..

ಯಾವ ಜನ್ಮದ ಪಾಪವೋ ಯಾವ ದೈವದ ಶಾಪವೋ
ನೂರ್ಕಾಲ ಜೊತೆಯಿರುವೆನೆಂದವ ತಾರೆಯಾದ
ನಿನ್ನ ಬೆಳೆಸಿ ಅರಸನಾಗಿ ಮಾಡೆಂದು ಮರೆಯಾದ..

ನನ್ನವರೆಂದವರೆಲ್ಲಾ ನನ್ನ ಹೊರದೂಡಿದರೂ

ನೆತ್ತರ ತೋಯಿಸಿ ಉಸಿರ ಬಸಿದು ಮುನ್ನಡೆದೆ
ನಿನ್ನ ಅರಸನಾಗಿಸಬೇಕೆಂದು ಬಾಳ ಸವೆಸಿದೆ...

ನಿನಗೆ ಹಾಲುಣಿಸಿದ ಮೊಲೆಗಳ ಕಂಡರಷ್ಟೇ
ಮೊಲೆಯುಣಿಸುವ ಮಾತೆಯ ಕಾಣದಾದರು
ದೇಹವನು ಚೆಂಡಾಡಿದ ಪಿಶಾಚಿಗಳಾದರು...

ನಿನ್ನ ಭವಿಷ್ಯದ ಭಯವೇ ಕಾಡುತಿಹುದು
ಕೊನೆಯುಸಿರಿನ ಕಣ್ಣಂಚಿನ ಹನಿಯಲೂ
ಬಾರದೂರಿಗೆ ಭಾರದ ಮನದಿ ಹೊರಟಿರುವೆ
ಕ್ಷಮಿಸಿಬಿಡು ನನ್ನ ಕಂದಮ್ಮ....

ಎಂ. ಆರ್. ಸತೀಶ್ - ಕೋಲಾರ